ນັກສຳມະນາກອນ ກົມ509 ສຳເລັດການຝຶກອົບຮົມວຽກງານສື່ມວນຊົນ

ນັກສຳມະນາກອນ ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ (ກົມ 509) ຈຳນວນ 31 ສະຫາຍ ໄດ້ສໍາເລັດການຝຶກອົບຮົມວຽກງານສື່ມວນຊົນ, ໃນວັນທີ 22 ມັງກອນ 2026, ເປັນກຽດເຂົ້າຮ່ວມ ແລະ ມອບໃບຢັ້ງຢືນໂດຍ ພັອ ສົມສະນິດ ຈັນທະວົງ ຮອງຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ມີບັນຄະນະພັກ, ຄະນະບັນຊາ, ຄະນະຄູ-ອາຈານຈາກກົມສື່ມວນຊົນເຂົ້າຮ່ວມ.

ພັອ ສົມສະນິດ ຈັນທະວົງ ກ່າວວ່າ: ໂດຍປະຕິບັດຕາມແຜນການຝຶກອົບຮົມວຽກງານສື່ມວນຊົນ ໃຫ້ບັນດາພະແນກກອງກໍ່ສ້າງຮາກຖານ ກົມ 509 ເພື່ອຍົກສູງຄວາມຮູ້-ຄວາມສາມາດຂອງພະນັກງານໃນການເຜີຍແຜ່ເຊື່ອມຊຶມໂຄສະນາຂ່າວສານ ໃຫ້ເປັນເອກະພາບໃນດ້ານຫຼັການ, ຖືກຕ້ອງ ແລະ ສອດຄ່ອງກັບສະພາບເງື່ອນໄຂໃໝ່ ໃນການຈັດຕັ້ງປະຕິບັດໃຫ້ມີຄຸນນະພາບ ແລະ ມີຜົນສໍາເລັດສູງ.

ການຝຶກອົບຮົມໃນໄລຍະ 3 ວັນ, ນັກສຳມະນາກອນ ຈໍານວນ 31 ສະຫາຍ ໄດ້ຮຽນຮູ້ດ້ານເນື້ອໃນ ໂດຍຮັບຟັງການກ່າວເປີດພິທີຈາກທ່ານຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ເຊິ່ງໄດ້ຍົກໃຫ້ເຫັນຄວາມໝາຍ, ຄວາມສໍາຄັນຂອງວຽກງານສື່ມວນຊົນໃນການຂຽນຂ່າວ, ອອກຂ່າວ ແລະ ຕອບໂຕ້ບັນຫາຕ່າງໆ, ຮັບຟັງການບັນຍາຍເອກະສານຕ່າງໆຂອງວິທະຍາກອນຈາກກົມສື່ມວນຊົນ ເຊິ່ງມີບັນດາຫົວຂໍ້ ຄື: ຫຼັກການພື້ນຖານກ່ຽວກັບການຂຽນຂ່າວ, ເກັບກຳຂໍ້ມູນ ແລະ ນໍາໃຊ້ກ້ອງ; ຝຶກຂຽນຂ່າວຕົວຈິງ ແລະ ຖ່າຍພາບນຶ່ງ; ທິດສະດີການນໍາໃຊ້ກ້ອງວີດີໂອຖ່າຍທຳ, ຕັດຕໍ່, ລົງໂປຼແກຼມຕັດຕໍ່.

ພ້ອມດຽວກັນນີ້, ວິທະຍາກອນ ໄດ້ກວດກາການຖ່າຍທຳ, ການຂຽນຂ່າວຕົວຈິງທີ່ໄປສຳພາດການອອກບັດ ໂດຍໃຫ້ນັກສຳມະນາກອນນໍາສະເໜີຂ່າວທີ່ຕົນເອງຂຽນ ແລະ ສົນທະນາແລກປ່ຽນຄໍາຄິດເຫັນກ່ຽວກັບການຂຽນຂ່າວ, ຖ່າຍຮູບ, ຖ່າຍວິດີໂອ, ບັນນາທິການສັງລວມຄໍາເຫັນ.

ຜ່ານການຝຶກອົບຮົມ ເຫັນວ່ານັກສຳມະນາກອນແມ່ນມີຄວາມຕັ້ງໃຈຮັບຟັງການບັນລະຍາຍເອກະສານ, ກ້າສະແດງຄວາມຄິດເຫັນແລກປ່ຽນບົດຮຽນຢ່າງຈິງຈັງ, ເລິກເຊິ່ງກົງໄປກົງມາ ແລະ ປະຕິບັດໂມງເວລາຂຶ້ນຫ້ອງໄດ້ດີ.

ໃນໂອກາດນີ້, ພັອ ສົມສະນິດ ຈັນທະວົງ ໄດ້ມອບໃບຢັ້ງຢືນໃຫ້ນັກສຳມະນາກອນ ຈຳນວນ 31 ສະຫາຍ ເພື່ອຢັ້ງຢືນເຖິງຜົນສໍາເລັດໃນການຝຶກອົບຮົມຄັ້ງນີ້.