ສໍາເລັດກອງປະຊຸມສະຫຼຸບການຈັດຕັ້ງປະຕິບັດຄໍາສັ່ງ ວ່າດ້ວຍການເກັບກູ້ອາວຸດປືນ ແລະ ວັດຖຸລະເບີດ ໃນຂອບເຂດທົ່ວປະເທດ
ໃນວັນທີ 18 ສິງຫາ 2026 ກອງປະຊຸມສະຫຼຸບການຈັດຕັ້ງປະຕິບັດ ຄໍາສັ່ງ ເລກທີ່ 11/ນຍ ວ່າດ້ວຍການເກັບກູ້ອາວຸດປືນ ແລະ ວັດຖຸລະເບີດ ໃນຂອບເຂດທົ່ວປະເທດ ໄລຍະສອງ 2024-2026 ແລະ ທິດທາງແຜນການ ໄລຍະສາມ 2026-2028 ໄດ້ອັດລົງດ້ວຍຜົນສໍາເລັດ ເປັນປະທານໂດຍ ພົທ ວັນທອງ ກອງມະນີ ຄະນະເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ ຫົວໜ້າຄະນະຮັບຜິດຊອບຊີ້ນໍາລວມໃນການຂຶ້ນບັນຊີເກັບກູ້ ຄຸ້ມຄອງອາວຸດປືນເສິກ ແລະ ວັດຖຸລະເບີດ, ມີທ່ານ ຮອງລັດຖະມົນຕີບັນດາກະຊວງ, ຫົວໜ້າກົມໃຫຍ່, ກອງບັນຊາການ, ວິທະຍາຄານ, ປກສ ນະຄອນຫຼວງວຽງຈັນ, ປກສ ແຂວງ, ກົມ, ກອງວິຊາສະເພາະ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.
ພົທ ວັນທອງ ກອງມະນີ ໄດ້ມີຄໍາເຫັນໂອ້ລົມ ແລະ ກ່າວປິດກອງປະຊຸມຄັ້ງນີ້ ວ່າ: ກອງປະຊຸມສະຫຼຸບການຈັດຕັ້ງປະຕິບັດຄໍາສັ່ງເລກທີ 11/ນຍ ໄລຍໄລຍະທີ 2 ໄດ້ດໍາເນີນມາເປັນເວລາ 1 ວັນເຄີ່ງ ຊຶ່ງໄດ້ຮັບຟັງການສະຫຼຸບຕີລາຄາ ການຈັດຕັ້ງປະຕິບັດວຽກງານການຂຶ້ນບັນຊີຄຸ້ມຄອງ, ເກັບກູ້ອາວຸດປຶນເສິກ ແລະ ວັດຖຸລະເບີດ ໃນໄລຍະປີ 2024 – 2026 ແລະ ທິດທາງແຜນ ການປີ 2026-2028 ແລະ ເຊື່ອມຊືມເອກະສານສໍາຄັນ ຢ່າງກົງໄປກົງມາ, ມີຄວາມຮັບຜິດຊອບສູງ ແລະ ມີໝາກຜົນຕົວຈິງ. ພ້ອມນັ້ນ, ຍັງໄດ້ຮັບຟັງການປະກອບຄຳຄິດຄຳເຫັນຂອງບັນດາຄະນະກຳມະການຮັບຜິດຊອບຂຶ້ນບັນຊີຄຸ້ມຄອງ, ເກັບກູ້ອາວຸດປຶນເສີກ ແລະ ວັດຖຸລະເບີດ ຂອງແຕ່ລະຂະແໜງການ ນັບທັງຢູ່ສູນກາງ ແລະ ທ້ອງຖິ່ນ ຢ່າງມີເນື້ອໃນເລິກເຊີ່ງ ທີ່ຊີ້ໃຫ້ເຫັນສະພາບອາວຸດປຶນເສິກຢູ່ປະເທດເຮົາ, ດ້ານຕັ້ງໜ້າ ແລະ ຂໍ້ຄົງຄ້າງ ໃນການຈັດຕັ້ງປະຕິບັດວຽກງານໃນຂົງເຂດຂອງຕົນຮັບຜິດຊອບ, ມີຜົນປະໂຫຍດໃຫ້ແກ່ວຽກງານເກັບກູ້ອາວຸດປຶນເສິກຂອງພວກເຮົາ ໃນປັດຈຸບັນ ແລະ ຕໍ່ໜ້າ.
ຄະນະກໍາມະການຂຶ້ນບັນຊີຄຸ້ມຄອງ, ເກັບກູ້ອາວຸດປຶນເສິກ ແລະ ວັດຖຸລະເບີດ ແຕ່ລະຂັ້ນ ນັບທັງສູນກາງ ຮອດທ້ອງຖິ່ນ ໄດ້ໃຫ້ຄວາມສຳຄັນຕໍ່ບັນຫາດັ່ງກ່າວ, ໄດ້ມີຄວາມພະຍາຍາມສູງໃນການຈັດຕັ້ງປະຕິບັດຄໍາສັ່ງເລກທີ 11/ນຍ ແລະ ຄໍາສັ່ງອື່ນໆ ຕາມຂົງເຂດວຽກງານຕົນຮັບຜິດຊອບ ໄດ້ເປັນຢ່າງດີເປັນຕົ້ນແມ່ນ ໄດ້ມີການປັບປຸງ ແລະ ແຕ່ຕັ້ງຄະນະຮັບຜິດຊອບໂດຍກົງໃນແຕ່ລະຂັ້ນ, ພ້ອມທັງສ້າງຄວາມເຂັ້ມແຂງໃຫ້ແກ່ຜູ້ຈັດຕັ້ງປະຕິບັດຕົວຈິງ, ໃຫ້ມີຄວາມເຂັ້ມແຂງ ເພື່ອເຮັດວຽກງານການຂຶ້ນບັນຊີຄຸ້ມຄອງ, ເກັບກູ້ອາວຸດປຶນເສິກ ແລະ ວັດຖຸລະເບີດ ຢູ່ໃນຂົງເຂດຂອງຕົນຮັບຜິດຊອບ ໄດ້ມີຄວາມຮັບປະກັນ ແລະ ມີປະສິດທິຜົນ; ໄດ້ສຸມໃສ່ເຊື່ອມຊືມເອກະສານ ແລະ ໂຄສະນາຊວນເຊື່ອ ດ້ວຍຫຼາຍຮູບ, ຫຼາຍສີ, ຫຼາຍວິທີການຜ່ານທາງວິທະຍຸ, ໂທລະພາບ, ສື່ສັງຄົມອອນລາຍ ແລະ ນຳໃຊ້ພະນັກງານລົງໂຄສະນາ ເຮັດໃຫ້ພົນລະເມືອງເຮົາ ໃນບັນດາຊັ້ນຄົນ ໂດຍສະເພາະຜູ້ທີ່ຄອບຄອງອາວຸດ ນັບທັງຢູ່ສູນກາງ ແລະ ທ້ອງຖິ່ນຢູ່ຫ່າງໄກສອກຫຼີກໄດ້ຮັບຮູ້-ເຂົ້າໃຈ, ມີສະຕິລະວັງຕົວຕໍ່ການນໍາໃຊ້ອາວຸດປຶນເສີກ ແລະ ໃຫ້ຄວາມຮ່ວມມືໃນການສົ່ງມອບອາວຸດປຶນເສີກ ແລະ ວັດຖຸລະເບີດ; ໄດ້ນຳໃຊ້ມາດຕະການທາງດ້ານກົດໝາຍຕໍ່ຜູ້ກະທຳຜິດອາຍາ ແລະ ມີອາວຸດປຶນເສີກໄວໃນຄອບຄອງ ໂດຍສະເພາະ ໄດ້ຈັບກຸ່ມຜູ້ກະທຳຜິດ, ຜູ້ຄ້າອາວຸດ ແລະ ຫົວໂປ່ໂຕການໄດ້ຈຳນວນໜຶ່ງ ມາດຳເນີນຄະດີຕາມກົດໝາຍ, ໄດ້ເອົາໃຈໃສ່ ຂຶ້ນບັນຊີຄຸ້ມຄອງ, ເກັບກູ້ອາວຸດປຶນເສິກ ແລະ ວັດຖຸລະເບີດໃນຂອບທົ່ວປະເທດ ພ້ອມທັງ ຈັດກໍາລັງລົງຕິດຕາມ, ຊຸກຍູ້ຢູ່ສູນກາງ ແລະ ທ້ອງຖິ່ນຢ່າງຕໍ່ເນື່ອງ.
ພ້ອມນີ້ ທ່ານລັດຖະມົນຕີກະຊວງ ປກສ ຍັງໄດ້ຮຽກຮ້ອງໃຫ້ ຄະນະກຳມະການທີ່ຢູ່ທຸກຂະແໜງການ ຕ້ອງຖືເອົາຄໍາສັ່ງເລກທີ 11/ນຍ ແລະ ຄໍາສັ່ງອື່ນໆ ຕາມຂົງເຂດວຽກງານຕົນຮັບຜິດຊອບຫັນມາເປັນແຜນງານ, ກິດຈະກໍາຂອງຕົນແລ້ວຈັດຕັ້ງປະຕິບັດໃຫ້ມີປະສິດທິຜົນ, ກາຍເປັນຂະບວນການລວມທົ່ວສັງຄົມ ຄືກັນກັບວາລະແຫ່ງຊາດຂອງພວກເຮົາ ເນື່ອງຈາກການແກ້ໄຂບັນຫາອາວຸດປຶນເສິກ ແລະ ວັດຖຸລະເບີດ ແມ່ນເພື່ອຮັບປະກັນຄວາມໜັ້ນຄົງ, ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ທັງເປັນການປົກປ້ອງ ພາລະກິດການປະຕິວັດຂອງປະເທດເຮົາ, ສຸມໃສ່ແກ້ໄຂປະກົດການຫຍໍ້ທໍ້, ບັນຫາອາຊະຍາກຳຕ່າງໆທີ່ຕິດພັນກັບການນໍາໃຊ້ອາວຸດປຶນເສີກ ຢ່າງເຂັ້ມງວດ, ເດັດຂາດ ແລະ ໂປ່ງໃສ; ໃຫ້ບັນດາກົມວິຊາສະເພາະ, ປກສ ແຂວງ-ນະຄອນຫຼວງ ຈົ່ງຮັບຮູ້ໄດ້ທັນເວລາເຖິງການປ່ຽນແປງ ແລະ ວິວັດທະນາການໃໝ່ ໃນຮູບແບບ, ວິທີການເຄື່ອນ ໄຫວຂອງອາຊະຍາກອນ ຕາມຈຸດພິເສດຂອງແຕ່ລະພາກ, ພື້ນທີ່, ເປົ້າໝາຍ ເພື່ອສ້າງແຜນການ, ໂຄງການແກ້ໄຂເຄືອຂ່າຍ, ກຸ່ມແກ້ງ, ເປົ້າໝາຍປະດິດ, ຊື້-ຂາຍ, ຂົນສົ່ງ, ຄອບຄອງ ແລະ ນຳໃຊ້ອາວຸດປືນເສີກ ແລະ ວັດຖຸລະເບີດຢ່າງຜິດກົດໝາຍ. ປະສານສົມທົບກັບກຳລັງຕ່າງໆ ທັງພາຍໃນ ແລະ ນອກຂະແໜງການ ຈັດຕັ້ງຈຸດການກວດກາ, ກວດກາລາດຕະເວນ, ຄວບຄຸມໃຫ້ທັນເວລາໃນການຄົ້ນພົບ, ຈັບກຸມ ແລະ ປະຕິບັດຢ່າງເດັດຂາດຕໍ່ການກະທຳຜິດໃນການປະດິດ, ຊື້-ຂາຍ, ຂົນສົ່ງ ແລະ ຄອບຄອງອາວຸດປືນເສີກ ແລະ ວັດຖຸລະເບີດຢ່າງຜິດກົດໝາຍ, ໂດຍສະເພາະແມ່ນການເຄື່ອນໄຫວຊື້-ຂາຍ, ຂົນສົ່ງອາວຸດປືນເສີກ ແລະ ວັດຖຸລະເບີດຢ່າງຜິດກົດໝາຍ ຕາມເສັ້ນຊາຍແດນ; ຕ້ອງຖືເອົາວຽກງານປ້ອງກັນເປັນກົກ, ເຮັດໃຫ້ວຽກງານດັ່ງກ່າວ ກາຍເປັນຄວາມຮັບຜິດຊອບຂອງທົ່ວສັງຄົມ, ທຸກຊັ້ນຄົນ, ທຸກເພດ, ທຸກໄວ, ທຸກອົງການຈັດຕັ້ງຢ່າງຕັ້ງໜ້າໂດຍການໂຄສະນາແນວທາງນະໂຍບາຍຂອງພັກ, ກົດໝາຍ, ລະບຽບການຂອງລັດ, ເຊີດຊູຈິດໃຈຮັກຊາດ, ສະຕິເປັນເຈົ້າຕົນເອງ, ໃຫ້ການຮ່ວມມື ແລະ ສະໜັບສະໜູນການຂຶ້ນບັນຊີຄຸ້ມຄອງ, ເກັບກູ້ອາວຸດປຶນເສີກ ແລະ ວັດຖຸລະເບີດ ໃຫ້ໄດ້ຮັບຜົນດີກ່ອນເກົ່າ.
