ພິທີປິດຝຶກອົບຮົມຄວາມປອດໄພທາງໄຊເບີ, ຄວາມປອດໄພຂອງຂໍ້ມູນ ແລະ ບັນດາມາດຕະການຕິດຕາມກວດກາລະບົບລວມສູນ

ໃນວັນທີ 21 ສິງຫາ 2026, ຢູ່ທີ່ ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ, ກະຊວງປ້ອງກັນຄວາມສະຫງົບ ໄດ້ຈັດພິທີປິດຝຶກອົບຮົມຄວາມປອດໄພທາງໄຊເບີ, ຄວາມປອດໄພຂອງຂໍ້ມູນ ແລະ ບັນດາມາດຕະການຕິດຕາມກວດກາລະບົບລວມສູນ. ໂດຍການໃຫ້ກຽດເປັນປະທານຂອງ ທ່ານ ພົນຈັດຕະວາ ແກ່ນຈັນ ພົມມະຈັກ, ຄະນະພັກກະຊວງ, ເລຂາຄະນະພັກກົມ, ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ. 

ເຂົ້າຮ່ວມພິທີໃນຄັ້ງນີ້ ມີບັນດາທ່ານໃນຄະນະພັກ-ຄະນະກົມ, ຫ້ອງການກົມ, ສູນຂໍ້ມູນພົນລະເມືອງ ແລະ ບັດປະຈຳຕົວ, ບັນດາພະແນກ, ຄະນະຊ່ຽວຊານ ຈາກ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ພ້ອມດ້ວຍ ເອກອັກຄະລັດຖະທູດ/ອົງການຜູ້ຕາງໜ້າ ແລະ ນັກສຳມະນາກອນເຂົ້າຮ່ວມຢ່າງພ້ອມພຽງ. 

ຊຸດຝຶກອົບຮົມດັ່ງກ່າວໄດ້ຈັດຂຶ້ນຢ່າງເປັນທາງການ ລະຫວ່າງວັນທີ 14 ຫາ 22 ສິງຫາ 2026 ໂດຍອີງຕາມຂໍ້ຕົກລົງວ່າດ້ວຍການອະນຸມັດຈັດຝຶກອົບຮົມ ເລກທີ 6187/ຄກຖ ແລະ ໜັງສືສະເໜີຂອງອົງການຜູ້ຕາງໜ້າ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ປະຈຳ ສປປ ລາວ. ຕະຫຼອດໄລຍະ 9 ວັນຜ່ານມາ, ນັກສຳມະນາກອນທັງໝົດໄດ້ຮັບການຖ່າຍທອດຄວາມຮູ້ທັງພາກທິດສະດີ ແລະ ພາກປະຕິບັດຕົວຈິງ ຈາກຄະນະຊ່ຽວຊານ ສສ ຫວຽດນາມ ເຊິ່ງມີເນື້ອໃນສຳຄັນ ຄື: 

1. ການສ້າງຄວາມຮັບຮູ້ດ້ານຄວາມປອດໄພຂອງຂໍ້ມູນ: ການຍົກລະດັບຄວາມເຂົ້າໃຈກ່ຽວກັບຄວາມສ່ຽງ, ໄພຂົ່ມຂູ່ທາງໄຊເບີ, ຫຼັກການປ້ອງກັນຂໍ້ມູນສ່ວນບຸກຄົນ ແລະ ການນຳໃຊ້ເຕັກໂນໂລຊີ AI (ChatGPT) ເຂົ້າໃນວຽກງານຢ່າງປອດໄພ ໂດຍຫຼີກລ້ຽງການປ້ອນຂໍ້ມູນທີ່ອ່ອນໄຫວ. 
2. ມາດຕະການຕິດຕາມກວດກາລວມສູນ: ໄດ້ຮຽນຮູ້ການຄຸ້ມຄອງລະບົບ  PAM/JUMP/RSA, ການນຳໃຊ້ຊອບແວຕິດຕາມເຫດການລວມສູນ Splunk, ຊອບແວປ້ອງກັນການຮົ່ວໄຫຼຂອງຂໍ້ມູນ  Zecurion ແລະ ລະບົບຕິດຕາມເຊີບເວີ Grafana, Prometheus, Zabbix. 
3. ການຍົກລະດັບຄວາມປອດໄພທາງໄຊເບີຂັ້ນສູງ: ການຝຶກປະຕິບັດການຄົ້ນຫາ-ຂຸດຄົ້ນຊ່ອງໂຫວ່ຂອງແອັບພລິເຄຊັນເວັບ (Web Application Penetration Testing), ການວິເຄາະມັນແວ (Malware Analysis), ເຕັກນິກການລວບລວມຂໍ້ມູນຈາກແຫຼ່ງເປີດ (OSINT), ການຮັກສາຄວາມປອດໄພໃນລະບົບ Linux ແລະ ການຊ້ອມຮົບທາງໄຊເບີ (Cyber Drill) ຈຳລອງການໂຈມຕີ-ປ້ອງກັນ ແລະ ການແກ້ໄຂເຫດການສຸກເສີນຕົວຈິງ. 

ຜ່ານການທົດສອບ ແລະ ປະເມີນຜົນໃນວັນສຸດທ້າຍ ພົບວ່າ ນັກສຳມະນາກອນທັງໝົດ 16 ສະຫາຍ ມີຄວາມຕັ້ງໜ້າ, ມີຄວາມຮັບຜິດຊອບສູງ ແລະ ສາມາດກຳແໜ້ນທິດສະດີ, ນຳໃຊ້ເຄື່ອງມືລະບົບກວດກາຄວາມປອດໄພ ລວມເຖິງການຮັບມືກັບເຫດການສຸກເສີນທາງໄຊເບີໄດ້ເປັນຢ່າງດີ. ໂດຍຜົນການປະເມີນຄະແນນ ມີດັ່ງນີ້: 

• ລະດັບດີຫຼາຍ (80-100%): ມີ 8 ສະຫາຍ 
• ລະດັບດີ (70-79%): ມີ 5 ສະຫາຍ 
• ລະດັບປານກາງ (69%): ມີ 1 ສະຫາຍ 
• ລະດັບພໍໃຊ້ (64%): ມີ 5 ສະຫາຍ 

ໃນພິທີ, ທ່ານ ພົນຈັດຕະວາ ແກ່ນຈັນ ພົມມະຈັກ ໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈຢ່າງເລິກເຊິ່ງ ມາຍັງຄະນະຊ່ຽວຊານຈາກ ສສ ຫວຽດນາມ ແລະ ກົມ 509 ທີ່ໄດ້ໃຫ້ການຮ່ວມມື, ອຳນວຍຄວາມສະດວກທຸກດ້ານ ເຮັດໃຫ້ຊຸດຝຶກອົບຮົມຄັ້ງນີ້ບັນລຸຜົນຢ່າງຈົບງາມ, ເຊິ່ງຖືເປັນບາດກ້າວສຳຄັນໃນການຍົກລະດັບຄວາມເຂັ້ມແຂງດ້ານຄວາມປອດໄພທາງໄຊເບີ ແລະ ຂໍ້ມູນພົນລະເມືອງຂອງ ສປປ ລາວ ໃຫ້ມີຄວາມປອດໄພ ແລະ ທັນສະໄໝ.